WILLEMSTAD.- Eksonerashon di pago di impuesto i primanan sosial, eksonerashon di pago di OB na servisio di impuesto i posponé introdukshon di e ABB na importashon ta algun di e medidanan ku ta bai tuma pa alivio den speransa ku doñonan di trabou por paga salario. E eksonerashonnan ta konta pa un periodo di 2 luna. Despues lo evaluá si mester prolongá  esakinan.

Esaki ta algun di e puntonan ku a bin dilanti den e dialogo nashonal ku a tuma lugá fin di siman riba Covid-19 i su impakto sosial ekonómiko. Awe gobièrnu a keda di duna informashon riba e pakete di alivio.

Pa e siman aki e efektonan den sektor di horeca ta bira aun mas bisto. Tur hotel práktikamente a sera i ta manda e personal kas.

A paga nan salario di fin di luna pero no ta konosí kiko ta bai pasa pa fin di aprel. Bankonan a bisa di lo no kobra pago di fiansanan pa 3 luna pero gobièrnu no tin sèn pa duna sosten salarial manera por ehèmpel Aruba a anunsiá.

Durante e diálogo e proposishon pa lanta un Fondo di Emergandia a subi mesa, pero ta awor ta bai buska maneranan pa kapitalisá e fondo. Den esei gobièrnu mes mester wak kon e ta paga salario di amtenar.

Si duna eksonerashon riba pago di impuesto gobièrnu no tin entrada pa paga gastu manera gastu di salario. Den esaki gobièrnu mester tene kuenta ku e aparato ta demasiado grandi i gobièrnu mes ta e konsumidó mas grandi riba merkado.

Pa hopi aña ta grita ku gobièrnu mester baha su gastunan dor di entre otro redusí e aparato públiko. Na 10-10-10 a engaña komunidat ku ora eliminá un nivel di gobernadhon debí ku ta desmanetlá Antianan Hulandes, ku e ekonomisashon di gastu aki lo bini outomatikamente.

Den práktika kontrali a resultá di ta bèrdat. Aworaki gobièrnu ta pensá pa posponé pago di  fiansanan ku a hasi serka Hulanda pa asina e mes tin sèn pa paga salario.

Gobièrnu di Reino ta dispuesto pa yuda Kòrsou, Aruba i St. Maarten ku fiansa kontra kondishon faboral i petishon pa ayudo monetario serka Union Oropeo. Gremio sindikal na Korsou ta haña sinembargo ku Reino mester bai mas leu i duna ayudo direkto na e islanan.