KRALENDIJK.- E palu mas bieu den henter Reino Hulandes ta na Boneiru, segun un publikashon den e revista Roots, spesialisá den naturalesa. Roots ta basa e ponensia aki riba deklarashon di Johan van Blerk, eksperto den palu i matanan ku tin den naturalesa di e isla aki. Van Blerk ta kalkulá edat di e palu en kestion, wayaká, na mil aña, di manera pues ku e tabata aki masoménos 500 aña promé ku spañónan a yega e isla na 1499.

“Esun ku sali en buska di e palu mas bieu di Boneiru ta pensa hopi biaha riba Hulanda situá na Noordzee. Pero na 2010 a ekspandé Hulanda ku tres isla tropikal, Saba, St. Eustatius i Boneiru. Riba e isla aki ta biba Johan van Blerk, konosedó di palu. E ta pensa ku un òf mas palu di wayaká na Boneiru ta 1000 aña bieu”, segun e artíkulo den Roots, ku ta agregá ku e nòmber sientífiko di wayaká ta ‘Guaiacum officinale’. Ta hopi mas bieu ku e palunan di mas bieu den Hulanda Oropeo.

Despues ku el a yega Boneiru na 2003 Van Blerk a ripará kon naturalesa di e isla aki ta bou di preshon. Esaki ta debí ku a kap hopi palu na Boneiru e último siglonan i pa motibu ku spañónan a introdusí kabritu i buriku riba e isla. Pa turista e animalnan aki ta interesante pa saka foto, pero kasi nan no ta duna chèns pa simia di e palunan aki sali. Spesialmente kabritu ta fretu sin kompashon delaster un pida bèrdè riba suela.

Van Blerk a konta: “Originalmente Boneiru tabatin hopi forestashon. Pero despues ku spañónan a konkistá e isla na 1499 e spañó i despues hulandesnan a kai ariba ku por ehèmpel palu di brasia (Haematoxylon brasiletto) tabata ideal pa produsí fèrf pa tela i palu di brasia (Bursera simaruba) pa traha sia pa buriku. E konkistadónan pues a kap e palunan aki pa loko, loke a hiba e bio-diversidat di e isla atras.”

Johan van Blerk a kuminsá un hòfi edukativo yamá Tera Bara den área di Tra’i Montaña. Mientrastantu e ta presidente di Fundashon Tera Bara, ku ta manehá un sinku hèktar, riba kua por mira e vegetashon original di Boneiru. No e palu i matanan ku sumpiña ku ta dominá e isla.

Pa haña e vegetashon original bèk Johan van Blerk a kuminsá buska simia di palunan original di Boneiru bèk. E mester a buska bon, pero el a haña sí simia di palunan ku mientrastantu a bira hopi skars. Huntu ku boluntario el a planta nan.

Durante su búskedanan di simia Johan van Blerk a topa na un sitio alehá ku un palu bieu di wayaká ku sentenáres di aña nan a kap. E tronkon dje palu aki a keda i a krese i splet. Riba e tronkon original tin awor dos tronkon.

E hulandesnan ku a konkistrá tabata yama e palu aki ‘pokhout’, konosí pa su duraresa. Pa motibu di su balor ekonómiko haltu a kap hopi di e palunan aki di wayaká.