PANAMA, AP.- Fiskalnan panameño a formulá kargonan kontra 17 persona den un investigashon relashoná ku pagonan di soborno di e konsturktor brasilero Odebrecht den e nashon Sentroamerikano.
Fiskal general Kenia Porcell a informá djamars ku esnan akusá mester entrega un deklarashon.
E medida ta tuma lugá despues di un kaso ku fiskalnan a kuminsá den mart 2016 despues ku Suisa a pidi Panama asistensia hudisial pa investigashonnan ku ta impulsá e pais europeo di kuentanan bankario relashoná ku Odebrecht.
Porcell a señalá ku entre e akusadonan tin ocho empresario panameño i sinku estranhero, tres eks funshonario i un ofisial di banko priva. E nòmbernan no a wòrdu revelá. “Ta trata di informashon reserva debí ku ta trata di un proseso penal”.
Outoridat panameño tin dos investigashon apart ku Brasil i Merka.
Departamento di Hustisia merikano a informá vários siman pasa ku e kompania a aseptá di a paga soborno multimionario den vários pais latinoamerikano i di Afrika pa haña kontraktnan.
Segun e informenan, e empresa, ku a kombertí den e kontratista mas grandi di Estado panameño ku obranan di mas di 9.000 mion dòler den último 12 añanan, a paga mas di 59 mion dòler na soborno den Panama entre 2010 i 2014 durante e gobièrnu di presidente Ricardo Martinelli.
E gobièrnu di presidente Juan Carlos Varela, kende a firma kontraktnan ku Odebrecht pa mas di 2.000 mion dòler apesar di skandalnan di korupshon relashoná ku e empresa a anunsiá resientemente ku e lo purba para e operashon di e kompania den futuro bentanan públiko, ounke no a sera porta kompletamente pa e kompania.
Odebrecht, a komprometé na paga 59 mion dòler na Panama komo konsekuensia di e skandal.
