SANTIAGO DE CHILE, AP.- Papa Fransisco a bolbe kousa rabia entre algun víktima di abusu seksual di un saserdote di Chile. El a kalifiká e akusashonnan komo “falsu” konta un obispu chileno ku a enkubrí Fernando Karadima, konsiderá komo e religioso pedofil mas grandi den e nashon andino.
E defensa di e pontífise argentino di e obispu na sùit di Osono, Juan Barros, a tuma lugá dos dia despues ku Fransisco a pidi pordon pa e skandalnan derivá di abusu kontra menornan ku ta wòrdu atribuí na Karadima.
Fransisco a toka e tema aki, riba e dia final di su bishita na Chile. E lo sigui pa Perú,e segundo pais den su biahe pastoral.
Papa a wòrdu kritiká na Chile paso na 2015 el a designá Barros komo obispu di Osotno, na sùit di e pais.
Barros tabata un di e disípulonan di Karadima, kende Vatikano a haña kulpabel den 2011 di abusá di menornan.
Den un karta di 2015 i ku The Associated Press a haña i publiká siman pasa, e pontífise a bisa ku el a kontemplá pa pidi renunsia di Barros i dos otro obispu akusá di sa di e abusunan kometé pa Karadima. Vatikano no a kontinuá ku e plan aki.
