VILLAVICENCIO, COLOMBIA, AP.- Papa Fransisco a reuní ku sobrebibientenan di un avalancha mortal di awa i lodo ku a asotá e siudat kolombiano chikitu di Mocoa den aprel. Esaki a mata 200 persona.
Fransisco a bisti su poncho blou i a reuní ku dies residente di Mocoa, sera di frontera ku Ecuador. Nan a reuní ku Papa algun ratu despues di misa di djabièrnè den e siudat kolombiano di Villavincencio.
E pontífise ya a manda su kondolensianan na Mocoa despues ku tres riu a basha ofer dia 2 di aprel kousando un avalancha di eskombro atraves di e siudat miéntras ku mayoria tabata drumi.
Papa Fransisco a probechá di e misa aki pa asina hasi orashon pa esnan afektá pa e temblor ku a sakudí México i laga 60 morto.
El a hasi referensia tambe na orkan Irma, ku a gòlpia Karibe lagando víktimanan i dañonan material atras.
Papa ta planta palu di pas
Papa Fransisco a pone flornan i planta un palu di pas den un krus konstruí na honor di e mas di 8 mion víktimanan di konflikto na Colombia.
El a hasi esaki na Villavicenio mes, durante un parada kòrtiku den su karavana despues di e seremonia di rekonsiliashon emoshonal kaminda víktimanan di e konflikto a asistí. Algun eks rebelde tambe a asistí.
E seremonia simbóliko di plantamentu di palu tabata un oportunidat pa Fransisco uni e idea di rekonsiliashon. Esaki ta e tema prinsipal di peregrinashon na Colombia.
