WILLEMSTAD.- Kas di Kultura ta organisá Paranda di Arte riba djasabra 3 i 10 di mart 2018. Bishitá e dia habrí na tayer di artista ku bùs di Kas di Kultura, bou guia di un eksperto. Den e rekorido di 3 ora, nos ta bishitá diferente tayer di artista.
Na mart 2018 artistanan visual di Kòrsou ta habri porta di nan tayer pa públiko. E evento aki ta konosí bou nòmber ‘Open Atelier Route’.
Durante 2 wikènt nan ta duna nos oportunidat pa mira kon nan ta traha i splika nos nan téknika. Esaki ta un chèns úniko pa públiko sera konosí ku nos artistanan i atmirá nan obra, den e tayer mes.
Djòin nos. Bishitá e dia habrí na tayer di artista ku bùs di Kas di Kultura. Bùs ta sali for di Scharlooweg 29 pa 10’or di mainta i e rekorido ta kaba 1’or di mèrdia. Por kumpra karchi adelantá na Kas di Kultura. Pa mas informashon por tuma kontakto ku sra. Thissen-Rojer: thissenj@kasdikultura.cw òf yama 4347307 / 6905185.
Preis di entrada ta 35 florin i e kantidat máksimo di partisipante ta 20 persona.
Por parker patras di e edifisio di Kas di Kultura.
KDK ta ofresé bùs ku èrko, guia di konsulente di arte visual, kos di bebe i un pasapalu.
Lo pasa serka 6 tayer di artista ku ta partisipá na e dia habrí. Si sobra tempu por pasa mas tayer.