WILLEMSTAD.- Djabièrnè 29 di sèptèmber di 7.00 – 9.00 anochi lo bolbe tin un tremendo “Paranda literario Artescrita” riba patio di Kas di kultura na Scharlooweg.  Fundashon Artescrita, den estrecho koperashon ku Kas di kultura, ta trese un programa mashá interesante i dibertido di deklamashon, kontamentu di kuenta, pasashi di historia di Willemstad i diferente sorpresa mas.

Esakinan ta keda presentá pa e grupo di hóben renombrá Anaku Kuumba, artistanan konosí manera Gibi Bacilio, Fifi Rademaker, Crisen Schorea i tambe artistanan for di seno di Artescrita mes, manera Payo Faneyte, Ilona Eustatia, Solange Hart, Ilse Schoobaar i Viola Ravenstein.

Naturalmente no ta falta e toke musikal, ku ta na enkargo di e elenko musikal di Kor Maestronan Penshoná ku  ta hasi hopi furor últimamente. E bar ku kushina tei pa malkriá e stoma.

E programa aki ta den kuadro di selebrashon di Siman di kultura. Ningun amante di e arte literario no por pèrdè e evenemento balioso aki, pues bo ta keda kordialmente invitá. Entrada ta solamente F 5,- i por haña karchi na Kas di kultura durante ora di ofisina i si sobra, na porta.

For di 6.30 p.m. ta kuminsá risibí e públiko ku músika. Artescrita ku Kas di kultura ta wardá bo.