WILLEMSTAD.- Fundashon Kultural Banda Bou, FKBB,  ta sumamente honrá ku bishita real di Rei Willem-Alexander i Reina Máxima durante seremonia ofisial di Dia di Bandera na Parke Himno i Bandera, Barber. E aña akí Barber ta selebrá Dia di Bandera pa di 34 biaha konsekutivo. No ta pa di promé biaha ku kas real ta bishitá Barber. Den pasado Reina Beatrix a bishitá Barber par di biaha. Manera kustumber FKBB a organisá un selebrashon ofisial ku énfasis riba nos kultura i logronan di Bándabou i un programa kultural festivo di kita sombré.
Pa e parti ofisial e aña akí ta toka Yahaira Muzo e honor pa entregá bandera na un otro abitante di Bándabou. For di tempu ku e tabata mucha te ku awe Muzo ta bishitá selebrashon di Dia di Bandera na Barber fiel. Carlos Zimmerman tin e honor di hisa e bandera. Ta konsiderá Zimmerman komo héroe di Barber ya ku aña pasá durante selebrashon di Dia di Bandera el a subi bai den palu komo ku e bandera a pega i no por a his’é. Zimmerman ta konosí tambe komo gran bailadó di nos bailenan folklóriko. Muzo i Zimmerman lo dirigí palabra na públiko presente.
Un par di hóben di klup di natashon di Bándabou, ‘Splash Club’, tin e honor di habri e bandera. Na luna di mart e grupo akí a saka kara di Kòrsou na Coral Springs Florida ora nan a logra no ménos ku 14 sinta, 8 medaya di bròns, 4 medaya di plata i 9 medaya di oro durante un kompetensia. Durante e parti ofisial pastor Curtis ta bendishoná e bandera. Grupo Rítmiko Orirí ta presentá den e parti ofisial i kantadó mayó di 2018 Furgell Wijngaarde tambe lo t’ei pa kanta ‘Ta nos mes.’
E parti ofisial di e programa ta di 12:00 pa 13:00’or. Despues tin e parti festivo i kultural ku ta kuminsá ku un bríndis i ta dura di 14:00 – te 22:00’or. Den e parti akí tin presentashon di Grupo Rítmiko Orirí, Típiko San Mangó di Bándabou i tambe Zoyoyo i su Grupo. ERA ta klousurá e grandioso selebrashon na Barber.
Pueblo di Barber ta invitá tur abitante di Kòrsou pa bin selebrá Dia di Bandera ku nos den e ambiente dushi, trankil i úniko di Bándabou. Kushina i bar di Parke ta bon surtí manera semper!