WILLEMSTAD.- Djasabra awor lo tin e promé i úniko festival multi kultural den kurá di Landhuis Chobolobo. Pa 12’or di mèrdia e porta ta habri pa hóben i adulto di kualkier kultura ta bon biní. E festival lo tin un durashon di 11 ora i e promé edishon lo presentá 4 diferente kultura: Cuba, Mexico, Kòrsou i Jamaica. Públiko lo sera konosí ku e diferente kultura pa medio di kuminda i entretenimentu. Pa 1’or di mèrdia ‘Park Fest’ lo keda habri ofisialmente dor di Minister Dr. I. Steve Martina, esaki relashoná ku e echo ku e organisashon lo pone parti di loke keda rekoudá komo donashon na Cuba i Mexico, esaki den kuadro dje desasternan di naturalesa na ámbos pais. Durante henter dia lo tin diferente aktividat pa tantu grandi i chikí. Lo tin diferente stent di kuminda ku lo presentá spesialidatnan di e kuater diferente paisnan partisipante. Pa loke ta trata muzik lo tin presentashon di entre otro Yumarya Grijt, Igort Rivas riba trompèt, Uprising Band, Mariachi Fortuna i nos Rei di Tumba, Amos Balentin. Karchi ta optenibel na van den Tweel Zeelandia i Jan Thiel, Landhuis Chobolobo i na Grand Cafe Mahaai.