WILLEMSTAD.- Despues di ekstenso negoshashon ku a dura bastante largu, porfin i ku masha orguyo i plaser S&S Entertainment Foundation por anunsiá  e yegada di e Parke di Divershon MAS grandi, nobo i moderno ku a yega di bishitá Kòrsou. Esaki, den estrecho koperashon ku  ‘Diverciones Interpark’.
Tur kos ta praktikamente kla pa e parke subi laman i kue rumbo pa Kòrsou. Famia Accetta, propietario di e parke, ta sumamente kontentu di bolbe regresá nos isla i di e forma aki, trese dibershon pa henter famia na un preis sumamente faborabel.
Hasi di INTERPARK e lugá pa bo entretené bo famia òf grupo di amigu, bini ku bo koleganan di trabou, organisá bo fiesta òf djis bini bo so i sinti e adrenalina den e mashinnan fantástiko ku ta na kaminda.
Parke di  mas grandi
No tin duda ku esaki lo ta e Parke di mas grandi i mas moderno ku ta bishitá nos Isla. Interpark ta bini  ku no ménos ku 25 aparato. Repartí den aparatonan  infantil, aparatonan pa pre-teens , tambe aparato pa Teener, i pa esnan mas grandi tambe lo tin poko atrakshon espektakular.
Den e totalidat, Interpark ta trese Kòrsou algun aparato ku nan ta yama “Aparatos DOBLE – EXTREMO!”. Entre esakinan, i komo un di esnan mas elektrisante ta figurá un aparato ku ta hiba bu 50 meter di altura for di nivel di suela !!. Esaki ta un di e aparatonan ku nunka a yega di bini Kòrsou.
INTERPARK ta definitivamente e Parke di mas nobo, mas moderno i mas atraktivo ku a yega di bini Kòrsou. Un Parke pa famia kompletu for di mucha chikí te ku mayornan.
Sambil
Pronto un i tur ku pasa banda di Sambil lo por tuma nota ku e instalashon di e Parke a kuminsá. Próksimamente e parke ta yega Kòrsou ku su kargamentu di 40 kònteiner!. E espasio ku lo wòrdu uzá ta full e parkeerplaats kaminda ta organisá Konsierto riba dje. SAMBIL su parkeerplaats a demostrá ya na vários okashon ku e ta fit bon pa eventonan ku ta hala hopi hende.
Interpark lo keda Kòrsou pa un periodo kòrtiku, konsiderando otro kompromiso ku e tin i den e kaso aki, na Aruba. Keda pendiente pa mas informashon ku pronto lo wòrdu suministrá pa ku e yegada i asina presensiá Interpark na Kòrsou, pa henter famia i na un preis masha faborabel.