Norman ‘Nooi’ Girigorie: PNP semper a sirbi interes di pueblo

WILLEMSTAD.- Miembro di Partido Nashonal di Pueblo (PNP), Norman ‘Nooi’ Girigorie, ta sugerí tur Parlamentario di e partido pa no aseptá bónùs fabuloso ku Gobièrnu a disidí di paga na tur empleado públiko i alabes nan mes komo minister i parlamentarionan. Ta trata di un bónùs di 8 porshento di e salario anual ku ta kasi igual na 1 luna di salario.

Un minister ta gana un salario di mas ku 19.500 florin pa luna. Riba esaki e ta risibí un kompensashon pa gastu di representashon di mas ku 2.600 florin. Parlamentarionan su salario ta mas ku 13.600 florin pa luna i nan ta risibí alrededor di 600 florin pa luna pa kompensashon di gastunan di representashon. Un bónùs di 8 porshento riba un base anual ta nifiká ku e minister- i parlamentarionan ta risibí den luna di desèmber un pago èkstra di 96 porshento (12x8) di nan salario.

Girigorie ta splika ku PNP ta un partido ku semper a sali na interes di e pueblo i no pa su mes. “Parlamentarionan mester sirbi e pueblo i no djòdjò di plaka di pueblo. Parlamento a gosa basta kaba di sèn di pueblo durante Kopa Mundial di futbòl ku biahenan pagá pa Gobièrnu.”

Girigorie ta mustra ku pueblo ta pasando den pobresa. Kosto di bida ta sigui subi tur luna. Preis di gasolin i disel ta bolbe subi den novèmber. Preis di komestibel den toko i supermerkadonan a subi drástikamente i tur esfuerso di polítikonan mester ta dirigí riba kiko pa hasi pa yuda esnan mas vulnerabel den komunidat.

Den esaki e ta ekspresá su preokupashon ku mas i mas e klase medio na Kòrsou tambe ta kai den pobresa debí na e oumento drástiko den kosto di bida, miéntras ku Gobièrnu no ta saka un man yuda nan. Prinsipalmente penshonadonan tin e difísil, pasobra nan sèn no ta yega mas pa kumpli ku tur nan nesesidatnan.

Den kaso ku depositá e bónøs tòg riba kuenta di e parlamentarionan, Girigorie ta bisa, ku e kos korekto pa hasi ta pa huntu ku partido tuma un desishon kon por organisá algu pa fin di aña pa esnan ménos pudiente ku ta sufri bou di e kosto di bida haltísimo aktualmente. Den esaki e ta pensa riba por ehèmpel traha pakete ku por repartí usando Kas di Pueblo komo sentro di distribushon. “E palabra ‘pueblo’ ta den nòmber di e partido i semper PNP a traha na bienestar di pueblo i den e kaso akí tambe parlamentarionan mester demostrá ku nan no ta keda ku e sèn.”

Separashon

E situashon ku a surgi akí ta motibu pa Girigorie bolbe mustra riba algu ku el a señalá kaba resientemente. Esaki ta, ku den partido mester tin separashon di funshon. E tabata kontra ku un kantidat di parlamentario a postulá nan mes pa un funshon den direktiva di partido.

“Aworakí ta ken ta kontrolá ken? E mesun parlamentarionan ku por bai risibí e bónùs ta den e direktiva ku mester kontrolá su mes i tuma desishon. Aworakí e kos a bira un konflikto di interes.”

Despues di e elekshon di 6 di òktober último, parlamentarionan Ruthmilda Larmonie-Cecilia, Ornelio ‘Kid’ Martina i Sheldry Osepa a drenta den e direktiva di PNP i ta nan mes mester bai disidí posishon di partido riba e pago di bónùs, Girigorie ta indiká. “Si prensa ke puntra opinion di partido riba e desishon pa paga minister- i parlamentarionan 8 porshento di bónùs fin di aña’kí, ta e mesun parlamentarionan ku ta risibí e pago mester bai duna splikashon.”

Girigorie ta finalisá bisando: “Di e forma’kí parlamentarionan a kue partido rehen. No por. Étika i bon kustumber ta, ku un persona no por tuma desishon si ta trata algu ku tokante su mes persona.”