Candelaria: Konsehero minister ta sospechoso prinsipal den kaso notorio

ORANJESTAD.-Faltando apénas algun dia promé ku Konseho di Minister di Reino ta reuní riba situashon di paisnan Kòrsou Aruba i Sint Maarten, na Aruba Parlamento ke sa ta kiko gobièrnu di e isla ta negoshando ku Ulanda, asina parlamentario Robert Candelaria (AVP) a kaba di trese dilanti den un konferensha di prensa.

Segun parlamentario Candelaria, na Aruba parlamentarionan ta pidi gobièrnu pa duna informashon ta kiko ta negoshando. E parlamentario ta mustra ku hustisia rubiano ta pasando den retonan grandi, pero no tin kontesta kiko ta pasando. E ta puntra kon Ulanda tin konfiansa den hustisia di Aruba ku na momentu ku e minister di hustisia di Aruba ta pone komo su promé konsehero e sospechoso prinsipal den kaso notorio flamingo. Brantwer, Wardakosta i Kuerpo polisial tur ta servisionan ku  no ta funshonando optimal. Tin hopi demotivashon. Nada straño ku Ulanda ke tuma hustisia arubano over.

Candelaria ta bisa ku Parlamento ke sa kiko ta bai pasa ku djabièrnè. E parlamentario ta kere ku Ulanda ta laga gabinete Wever-Croes papia pero no ta kambia nada na e plan ku ta kla kaba.