WILLEMSTAD.- Manera por a spera, e partido di futbòl ku lo a hiba selekshon di Kòrsou pa un wega di fogeo na Thailand dia 30 di mart benidero, a keda kanselá. FFK ta duna di konosé ku e wega no ta sigui mas pa motibu dje problema di Coronavirus na Thailand.

T’asina ku e federashon di futbòl tailandes a dirigí un karta na presidente di FFK, Shaheen Elhage, den kua ta partisipá ku gobièrnu di e pais a tuma e desishon ku ta para tur aktividat ku lo konta ku aglomerashon di hende.

E karta di e Promé Minister sr. Prayut Chan-o-cha ta duna di konosé ku mirando e brote di Coronavirus na Thailand a tuma medidanan di urgensia for di kual e gobièrnu di Thailand ta hasi un petishon na instansianan privá i gubernamental pa kanselá tur aktividat ku lo konta ku aglomerashon di hende, unda por eksponé nan mes na riesgo pa keda infektá ku e Coronavirus.