BERLIN, ALEMANIA (AFP).- Mayoria dje diputadonan di e partido aleman di ekstremo derecha AfD i un formashon di iskierda radikal ayera a bòikotiá e diskurso den Parlamento dje presidente ukraniano, Volodimir Zelensky, kende a atvertí pa e retórika pro ruso den Europa.
E mandatario tabatin un diskurso dilanti di parlamentarionan di Bundestag, e kámara abou di Parlamento aleman. E stulnan dje 77 diputadonan di AfD tabata práktikamente bashí i solamente kuater di nan tabata presente. “Nos ta nenga na skucha un orador den paña di kamuflahe”, segun e organisashon polítiko a bisa den un komunikado, afirmando ku “Ukrania no tin mester di un presidente di guera sino unu di pas”. E dies diputadonan dje partido iskierdista radikal BWX tambe a bandoná e reunion, ku un diskurso krítiko riba migrashon i e suministro di arma na Kiev.
E grupo aki a bisa di ke manda “un señal di solidaridat na tur e ukranianonan ku ke un pas di forma dirèkt i un solushon negoshá”. Pa e dos partidonan aki e elekshon europeo di djadumingu tabata un éksito.
AfD a bai para na di dos puesto ku kasi 16% di voto, tras dje konservadornan. BSW a superá e 6% i a superá e movementu históriko di ekstremo robes Die Linke (2.7%).
Durante di su bishita pa un konferensia internashonal riba rekonstrukshon di Ukrania, Zelensky a ekspresá su preokupashon pa e bon resultadonan elektoral di formashonnan “ku slogannan radikal pro ruso”. “Esei ta algu peligroso pa nan pais”, segun el a bisa den un konferensia di prensa huntu ku e hefe di gobièrnu aleman, Olaf Scholz.
