WILLEMSTAD.- Manera ya ta ampliamente konosí, otro siman djasabra dia 23 di yüni ta dia pa e tan antisipá evento Jazz Meets Cultures na Landhuis Brievengat. E evento aki ta úniko den sentido ku e músika Jazz ta topa kultura, mihó bisá nos géneronan lokal manera Tumba, Seú, Simadan, Tambú, Kizomba, Reggae, Ritmo Kombiná, Zouk i Son Montuno. Meta di e evento ta pa rekoudá fondo pa yuda nos hóbennan ku nan desaroyo artístiko.
E evento ta konta ku partisipashon di únikamente nos artistanan lokal. No mas ku djabièrnè último e artistanan a firma kòntrakt ku e fundashon organisadó, rekonfirmando di e forma ei nan partisipashon na e magno evento. Esnan ku ta partisipá na e di dos edishon di Jazz Meets Cultures ta: Mc Chris Strick i DaRidlaz; Grupo Rítmiko Sablika ku Furgell Wijngaarden, Rashid Felida, Damisha Reed-Gregorio i Ella Bernabela; Grupo Kompèr ku Neny Domacasse i Ishair Monte;  Dennis Aalse & Big Band ku Andrew Aalse, Reinier Lijfrock, Amos Balentin, Ray Lauffer, Djuric Virginie, Irvin Jano, Roald Balentien, Ivan Belfor, Aemy Niafeliz i Rendell Rosalia; Grupo Trinchera ku Niata Augusta i Merly Augusta i Uprising Reggae Band ku Aisha Lucas.
Dado kaso ku bo no tin karchi ainda, por akudí na un di e puntonan di benta ku ta 24 Uur uit de muur, Beep Beep, Mensing’s Caminada, Fusions, Gosie Grill, 4th of July Snack òf online na www.ticketscaribbean.com. Karchi VIP ta optenibel na 685-0650.
Pa mas informashon, por bishitá Jazz Meets Cultures riba retnan sosial, yama 540-0111 òf e-mail info@jazzmeetscultures.com.