WILLEMSTAD.- Mañan ta fecha pa inisio dje programa ‘Pasku Krioyo’ den Patio Krioyo na Gosieweg.
Radio Krioyo tin e kustumber di dediká su mes na nos kultura i kustumbernan di fin di aña. E aña aki a kuminsá e programa den Patio Krioyo i despues e otro fechanan lo tuma lugá den Alameda na Punda.
Mañan djadumingu for di 8’or di mainta lo tin sòpi, sanger di kabritu ku pan sera, ham di Pasku i Ayaka. Pa mèrdia lo tin guiambo, kabritu, tutu ku bakiou, sneibonchi i alaparia.
Pa 2’or di mèrdia lo tin presentashon di Pura Gaita i Zoyoyo.
Henter e elenko di lokutornan di Radio Krioyo lo sirbi den kushina i bar pa dje forma ei sosialisá ku nan oyentenan.
Despues di djadumingu awor tur siman lo tin Pasku Krioyo den Punda ku transmishon bibu pa nos pueblo sinti e ambiente di Pasku.
Saida Hernandez tambe ta kuminsá ku e programa ‘Pasku Krioyo’ tur djasabra 2’or
na Radio Krioyo 89.7 ku 13 aña ta tene nos kultura bibu.
Mañan djadumingu, ta na ‘Patio Krioyo’ nos tei topa pa biba nos kultura i kustumbernan di fin di aña.