WILLEMSTAD.- Patrick Grayham a lansa un solo nobo titulá “Champion” huntu ku Ziggi Recado. “Champion” ta un kansion di enkurashamentu i seguransa.
E promé ‘Mr. Olympia People’s Champion’, Roelly Winklaar, ta bini dilanti den e video musikal pa e kansion aki i ta duna un aporte konstruktivo na e video ku a keda grabá na Sint Maarten i Kòrsou.
“Champion” ta produsí pa Kris Salvatore (Chris Brown/ Fuse ODG) i ko-autor Robin P. Fransesco (Ronnie Flex/ Major Lazer).
E strea di músika reggae, Ziggi Recado ta duna e kansion un toke pikante, hungando ku palabranan i asina krea frasenan sofistiká den su kuplèt.
‘Champion’ ta optenibel riba tur plataformanan renombrá kaminda por ‘stream’ kantika. Patrick Grayham
Patrick Grayham ta un kantante i kompositor ligá na Sony/ATV di orígen karibense-ulandes. Grayham su kansionnan ta un kombinashon di músika urbano i ritmonan Karibense, mesklá ku vokalnan suave i konmovedor, den kual tambe por tende elementonan di músika eléktriko.
Grayham ta konosí pa e kansionnan “Fire”, “Bolbe” i “Pretty Girl”, kual a yega tòp di listanan musikal den Karibe, Sürnam i radio emisora FunX, kual ta un di e radionan urbano di mas grandi di Ulanda. Apesar di komponé su mes kansionnan, Grayham a komponé kansionnan pa otro artistanan tambe. E komposishon di mas notabel ta e kansion ‘Shot Gun’ pa artista Yellow Claw, kual a wòrdu sertifiká ‘triple platinum’.