MERKA.- Despues di 36 aña, Paul McCartney a bolbe kombertí su mes den e # 1 riba e lista di Billboard di Merka ku su álbum ‘Egypt Station’, ku a bende mas di 153 mil kopia.
E último biaha ku e eks Beatle a enkabesá e lista di benta tabata na yüni 1982 ku e disko ‘Tug of War’, pero ‘Egypt Station’ ta su promé produkshon ku ta yega e promé lugá di forma direkto.
Nunka ántes un artista bibu no a konkista e # 1 despues di un tempu dje largu ei, konkretamente 36 aña, tres luna i 10 dia.
E rekòr di tur tempu ta di e músiko di músika ‘country’, Johnny Cash, ku a fayesé na 2003, su albùm póstumo ‘American V: A hundred Highways’ a alkansá # 1 na 2006, 36 aña, 10 luna i 9 dia, esaki despues ku el a logra e puesto di honor ku e albùm ‘Johnny Cash at San Quentin’ na sèptèmber 1969.
Ta di 8 biaha ku McCartney ta alkansá # 1 riba Billboard sin Beatles, esaki kontando su éksitonan ku e grupo ‘Wings’, grupo ku el a krea despues ku el a kibra ku e banda britániko na 1970.
Ku Beatles, McCartney a liderá Billboard na 19 okashon, e último biaha na 2001 ku e kolekshon ‘The Greatest Hits’.