MERKA.- Bòlòmbònchi den frenta ta loke ku Cardi B a keda kuné despues di pelea ku Nicki Minaj.
E rappernan Nicki Minaj i Cardi B a bringa ku otro djabièrnè último durante di un fiesta relashoná ku e siman di Moda na New York. Cardi B a bandoná e fiesta ku un hinchá na su kara.
Segun un testigu di e insidente, Minaj tabata kabando ku un kombersashon ku un otro persona na momentu ku Cardi B a intentá pa ataké, e personal di seguridat di Minaj a intervení.
Un video ku ta sirkulá riba retnan sosial a mustra kon Cardi B tabata ataká un persona i ku el a keda wantá, esaki durante di e fiesta ‘Icons’, organisá pa e revista Harper’s Bazaar. Ta parse ku Cardi B lo mester a tira un di su sapatunan riba Minaj.
Un otro grabashon ta mustra kon agentenan di seguridat ta bai ku Cardi B for di e lugá.
Cardi B, bistí ku un trahe kòrá di Dolce & Gabanna, a wòrdu mirá ta sali for di fiesta ku loke ta parse un bòlòmbònchi na su kabes, e tabata pia abou.
Cardi i Minaj ta riba problema for di despues ku aña pasá Cardi B a kuminsá akapará atenshon i logrando éksito.
Un publikashon riba Instagram di Cardi B, kaminda e no ta menshoná Minaj direktamente a referí na e pelea i a bisa ku tur kos a kuminsá pa motibu ku a menospresiá e echo ku e ta mama. Cardi B resientemente a duna lus na su promé yu muhé ku e rapper ‘Offset’.