CAIRO, AP.- Un pelea entre dos makinista a kousa ku un trein a dal kontra un barera den e stashon di riel prinsipal na Cairo djaluna. Esaki su tanki di kombustibel a eksplotá provokando un kandela ku a laga por lo ménos 25 morto, segun funshonarionan egipsio.
Outoridat a señalá ku e trein tabata biahando ku velosidat haltu na momentu ku el a dal frontal kontra e barera. Por lo ménos 47 persona mas a resultá heridá durante e insidente.
E eksploshon i e kandela a kima e plataforma esnan ku tabata den área di e insidente na stashon Ramses. Videonan di kámara di seguridat a mustra kon e kandela a destrosá e stashon. Un grabashon publiká riba retnan sosial a mustra hòmbernan i muhénan kargando nan pertinensianan na momentu ku e trein a dal i eksplotá.
Den un otro video por a mira hòmber i muhénan koriendo despues di e eksploshon. Imágennan di paden a mustra vários kadaver kompletamente kimá.
Promé ku e kousa di e insidente a bira konosí e inspektor general di trein Ashraf Momtaz a bisa na The Associated Press ku outoridat tin vários hipótesis i un di nan ta bisa ku un persona a sende e trein na kandela i despues bula for di esaki. Na momentu di e aksidente funshonarionan no tabatin informashon tampoko si tabatin un konduktor riba e trein na momentu di e impakto, asina Momtaz a bisa
En general, aksidentenan di trein ta indiká “negligensia di makinista i supervisornan”.
E operador di e riel a suspendé tur servisio di trein i a evakuá e stashon.
