WILLEMSTAD.- Tres sineasta lokal, Anton de Bies, Sulin Passial i Jermain Lo ta produsiendo ‘Ku Amor pa Kòrsou’. 'Ku Amor Pa Kòrsou' ta trata entre otro emansipashon kultural di nos isla i influensia di nos idioma papiamentu riba pueblo di Kòrsou. Tur esaki inspirá pa e bida di Hemayel Martina. E hóben poeta ku tabata stima su isla mas ku nada. Lástimamente el a fayesé nèt na momento ku el a kuminsá bira konosí na Kòrsou. Djárason awor, 19 di desèmber pa 7 or di anochi nan lo tin un enkuentro ku pueblo di Kòrsou for di 7 or di anochi kaminda nan lo splika kon nan ke realisá e pelíkula ‘Ku Amor pa Kòrsou’. Nan lo trata tambe tópikonan manera desaroyo di industria di pelíkula na Kòrsou ku ta kresiendo. Sulin Passial i Anton de Bies lo presentá e anochi. E presentashon ta tuma lugá na Casa Moderna, situá den Madurostraat na Punda i ta kuminsá pa 7 or di anochi. Pa mas informashon por bishita e página di facebook: FB.ME/LoveForCuracao òf e wèpsait www.amorpakorsou.com.