WASHINGTON, AP.- E ekspanshon fuerte di forsanan armá chines i e agresividat ruso kresiente ta e prioridatnan mas grandi di seguridat nashonal di forsa armá merikano. Esaki ta surpasá e menasa di terorismo, segun indikashon di pentágono djabièrnè.
Un strategia nobo di defensa nashonal ta sostené ku e kompetensia ku China i Rusia ta menasa e bentaha militar di Merka rònt mundu i ku ta rekerí mas invershon pa forsanan merikano bira mas legal i apto pa guera.
“Nos lo sigui ku e kampaña kontra teroristanan, pero e kompetensia entre e potensianan grandi ta e foko prinsipal di seguridat nashonal den Merka”, asina e sekretario di Defensa, James Mattis a bisa, den Fakultat Johns Hopkins di Estudio Internashonal Avansá.
El a proklamá e derota di e “kalifato físiko” di estado islámiko den Irak i Siria, pero a atvertí ku ISIS, Al Qaeda i otro gruponan ekstremista ainda ta un menasa rònt mundu.
E dokumento ta reflehá e inkietut persistente di Merka pa loke ta e akumulashon militar di Beijing den Laman na Sur di China, e ekspanshon di su influensia polítiko i ekonómiko global i ta wòrdu kalifiká komo su kampaña sistemátiko di atake informátika i robo di informashon di organismonan di gobièrnu i empresanan merikano privá.
