WILLEMSTAD.- AMAK pa medio di e espasio aki,  kier duna atenshon i honor póstumo na algun baluarte i i un persona ku a kontribuí ku AMAK durante basta aña.
Awe, djabièrnè 13 di aprel 2018,  lo tuma despedida di Edseline Martha, entre 8.30 i 930 mainta na el Tributo.
Edseline pa hopi aña tabata e persona ku durante tur aktividat di AMAK, tabata duna un man den e parti kulinario, i tur músiko, por  rekord’é  ora  ku su santu pasenshi e tabata sirbi músikonan i invitadonan riba e.o dia Dia di Músiko.
Edseline a bira malu , momento ku riba dia di Músiko 2016, e tabata yuda prepará kuminda pa e selebrashon di anochi. Despues su situashon a empeorá te ku el a fayesé.
Direktiva di Amak ta ekstendé palabranan di kondolensia na su famia.
Dia 11 di aprel nos ta rekordá e fecha, ku José Uti Gregorio a bai laga nos. Djasabra awor, 14 di aprel pa 7’or di anochi lo tin un Santu sakrifisio di Misa na misa di Janwe. Músikonan tur ta keda invitá pa asistí na e Santu sakrifisio di Misa aki. Uti tabata un gran músiko areglista, ku sigur a aportá en grande na nos desaroyo musikal.
Djadumingu 15 di aprel, nos ta rekordá e echo, ku e trompetista ku su trompèt di oro, Don Edgar ‘Gachi’ Supriano a bai laga nos 30 aña pasá.
Lo tin un Santu sakrifisio di misa pa mitar di shete (18.30) anochi na misa di Sta Maria.
Edgar a  bai laga nos na un edat relativamente hóben, pero su aporte na farándula i Amak tabata di gran balor. Ban duna atenshon i honor póstumo na nos baluartenan.