LIMA, AP.- Presidente peruano Pedro Pablo Kuczynski a kalkulá mas o ménos 9.000 mion dòler di kosto di rekonstrukshon den zonanan gòlpia pa e fenómeno klimatiko El Niño ku a kousa morto di 106 persona te ainda.
E mandatario a atmití ademas, ku e kresementu di ekonomia lo wòrdu afektá pa e áwaseru, inundashon, avalancha i riunan ku a yena.
Kuczynski a splika atraves di radio lokal RPP ku e rekonstrukshon inmediato di kas i konekshon di kamindanan lo impliká 3.000 mion dòler miéntras ku den próksimo sinku aña lo mester di por lo ménos 6.000 mion dòler pa realisá obranan “pa hasi Perú un pais moderno”.
E áwaseru a afektá 973.000 peruano, spesialmente na kosta nort di Pasífiko. 2.350 kilometer di kaminda i 28 hèktar di agríkola a keda destruí miéntras 650 brùg i mas di 212.00 kas a sufri dañonan.
Banko Sentral a duna proyekshon di kresementu ekonómiko i esaki lo ta 3,5% e aña aki. Promé ku e komienso di áwaseru e tabata 4,3%.
Gobièrnu ta kulminando evakuashon di míles di persona den pueblonan aisla pa inundashon di un sentenar di buelo militar ku ta kuminsá rehabilitashon di servisionan básiko, spesialmente konekshon di kaminda. Esaki por krea 20.000 puesto di trabou sigur pa un luna pa personanan pober ku ta yuda ku e labornan.
