LIMA, AP.- Algun dia despues ku papa Fransisco a bandoná Perú, e Kongreso di e pais andino a promové un lei ku ta permití konstrukshon di kaminda den un área pristina di mondi serka di Brasil.
E norma nobo ku a drenta na vigor riba djamars ta kibra konvenionan internashonal i ta riesgá bida di indigenanan aislá ku ta biba den e zona.
E legislashon ta establesé ku e kamindanan ta wòrdu konstruí den region di Ucayali respetando e “áreanan natural protehá i pueblonan indígena ku ta biba den esaki”, pero ambientalista, gruponan outóktono i asta algun sektor di gobièrnu a kritiká esaki.
E lei a materialisá despues ku e mandatario Pedro Pablo Kuczynski no a usa su poder presidensial kontra esaki, kasi 50 dia promé ku su aprobashon na komienso di desèmber den parlamento dominá pa e partido di e lider opositor derechista Keiko Fujimori.
Den desèmber, Vicotira Tauli-Corpuz, relator di Nashon Uní riba derechi di pueblo indígena a pidi Kuczynski pa ophetá kontra e norma i a bisa ku “esaki por tin konsekuensianan ireversibel pa e sobrebibensia di e gruponan aki, kual su aislamentu ta pone e pais na gran riesgo di impakto riba nan derechinan humano”.
Djaweps último, durante su bishita ofisial den e pais, Papa Fransisco a subi su bos na fabor di e indigenanan aislá, kende a wòrdu kalifiká komo “esnan mas vulnerabel entre esnan vulnerabel” i a pidi pa defendé.
