NEW YORK, MERKA.- E kantante i produktor Pharrell Williams, outor dje éksito ‘Happy’ ta rékete okupá ku su yunan ku a kaba di nase.
Den un entrevista na televishon resientemente el a indiká ku kria un ‘drieling’ ta un trabou hopi duru.
Williams, 44 aña, a konta kon e ta pone e yunan drumi. E yunan ku a nase den luna di yanüari ta spesialista den reakshoná na kadena, un tras di otro. ‘Nan ta yora na unísono, manera e promé kuminsá, e di dos ta sigui i djis un ratu e di tres tambe ta kuminsá yora’, asina Williams a splika.
No opstante di esei, el a konta ku e tres muchanan ta sumamente bon di salú. Ainda e no a revelá e nòmber, ni sekso di e muchanan ku ta fruta di e relashon di su matrimonio ku Helen Lasichanh. Apart di e trio, nan kada un tin un yu di 8 aña ku tin e nòmber ‘Rocket’.