WILLEMSTAD.- Señor Fifi Rademaker a ser rekonosé komo e “Baluarte pa Karnaval 2019”, serka Fundashon JAG pa tur lokual nan e la hasi pa mas ku 45 aña den nos Karnaval. Fifi a militá pa hopi aña den e Grupo Globo. Fifi a konsehá i guia hopi grupo ku tur tipo di idea i konsehonan. Fifi a duna nos Partisipantenan pa Elekshon Adulto 2019 un tremendo charla kon Karnaval a kuminsá i desaroyá pa bira loke e ta aworakí. Fifi ta wòrdu rekordá komo un di e personanan klave den e hazaña di e karosa di ”Makaku” di Grupo Globo ku a kima apénas dos dia promé ku Gran Marcha. Djasabra anochi durante di un fiesta entre e amigunan di Fifi Rademaker “Wonder Group” pa mas ku 30 aña kaba na nan stelazje na Planterust, Fundashon JAG huntu ku algun Embahador, finalistanan i Rei di Tumba Hubenil 2019, Sontje Mercelina a duna Fifi un opsekio komo e Baluarte pa Karnaval 2019. Juni Aniceta a ekspresá su mes kon honra nan ta ku Fifi a aseptá esaki serka Fundashon JAG i Fifi tambe huntu ku su famia i amigunan a keda hopi emoshoná ku e rekonosimentu aki. Riba e fotonan por apresiá e bunita momento aki.