WILLEMSTAD.- Fundashon JAG ayera tardi a presentá limonada Coca-Cola komo ‘E Pilá’ i Sr. Philip ‘Fifi’ Rademaker komo e baluarte pa Karnaval 2019. E empresa Curaçao Beverage Bottling Company, emboteyadó di Coca-Cola na Kòrsou durante di hopi aña a duna su aporte na selebrashon di Karnaval di Kòrsou. E popular grupo di Karnaval di Bándabou di Sra. Frida Vrutaal, Grupo Coca-Cola pa hopi aña a partisipá na Karnaval di Kòrsou. Esakinan entre otro tabata motibu pa Fundashon JAG nombra nan komo ‘E Pilá’ di Karnaval 2019. Sr. Philip ‘Fifi’ Rademaker ta e baluarte di Karnaval 2019. Konosí komo diseñadó di diferente karosa i trahenan pa Karnaval a keda sorprendé ora ku a notifik’é dje desishon. ‘Mi no a spera esaki niun ora. E distinshon aki no ta di mi so, ta dje tim ku a traha huntu ku mi’, asina Fifi a indiká. ‘Mi ta kontentu ku ‘somehow’ a kòrda riba mi. Masha masha danki, ta un honor ku mi no a spera’. Un dje obranan di Fifi ta e ‘Makaku di grupo Globo’, un karosa ku un makaku di 9 meter largu ku 4 meter di rabu ku a kima riba e djabièrnè anochi promé ku Gran Marcha i ku a keda harmá bèk i presentá den kaya riba djadumingu di Gran Marcha’.