WILLEMSTAD.- Tres wega a resultá di ta sufisiente pa Pichingolo a ‘sweep’ Souax i konkistá su di trintiocho kopa komo kampion di Kòrsou. Pichingolo pa di dos aña siguí ta kue e título i a hasi esaki ku un viktoria di 8-7 riba Souax. Hit di e emergente Nicole Antersijn den di seis inning tabata bon pa e karedanan ku a marka e diferensia den e partido.

..Veterano picher Arnalda Margaritha a risibí e kopa di kampion...

Pichingolo a start fuerte ku dos kareda den e inning inisial, pero dirèkt Souax a kontestá ku un. Pichingolo ta kue dos mas den di tres i tabata den bòm di kuarto entrada ku Souax ta rally pa tres pa empatá e wega 4-4. Den e inning ei Souax a ataká e picher Arnalda Margaritha kende mester a traha lugá pa Julisse Koffy.
Den di sinku Pichingolo ta bolbe bai ariba ora ku Pelos konektá doblete pa hasi e skor 6-4. Den kabes di seis ta surgi e bataso di Antersijn i huntu ku eror, dos kareda ta drenta kual nan a resultá sufisiente pa gana e wega. Pues ounke Souax ta kue tres mas den bòm di seis, nan ta keda nèt un kareda kòrtiku.
Den di shete tur dos picher ta saka tres out di forma konsekutivo i finalmente Pichingolo por a selebrá.

...Manager Poulo (r) di Souax a hiba su ekipo final i a keda komo sup kampion...

E ekipo di Buena Vista ku e final di 2020 a hunga 45 final di kua nan a gana trintiocho.
Pa Pichingolo 8 kareda, 6 hit i 2 eror. Julise Koffy a gana lansando 4 inning di 4 hit, 3 kareda, 1 ponche i 3 base por bola. Peloz a liga di 3-1 i empuhá 4 kareda. Nicole Antersijn di 1-1.
Pa Souax 7-6-3. Kimberley Agard a bati di 1-1. J’dah Girigorie a sufri e derota permitiendo 6 hit, 8 kareda, poncha 5 i duna 5 base por bola.

...Hungadó mas Balioso a resultá Stephany Passial...

...Selebrashon serka hungadónan di Pichingolo...

...Souax tambe a selebrá e logro ku nan a yega final...

...Primera base di Pichingolo ta piki e bala...