PARIS, AP.- Piskadónan di Fransia i Gran Bretaña a dal boto kontra otro e siman aki den un pelea pa akseso na un zona riku ku ‘scallops’ nort di e kosta franses. E funshonario marítimo di Fransia, Ingrid Parrot a deskribí e konfrontashon di djamars entre 35 bordo franses i sinku britániko den awa internashonal komo “hopi peligroso”, ounke no tabatin herido.
“Esaki tabata hopi tenso”, asina el a agregá. “Nos ta spera berdaderamente ku kosnan ta kalma”.
Tur aña tin problema entre piskadónan di e dos paisnan aki pa e mesun motibu, asina el a bisa. Sinembargo, kontrali na loke a pasa e biaha aki, esaki generalmente ta pasa sin violensia. E bringamentu a wòrdu grabá pa trahadónan di un kanal di televishon franses. E video ta mustra botonan di peska ku ta dal kontra boto tirando por lo ménos algun vürwèrk.
E Organisashon di produktor di Peska na Sùitwèst a akusá e piskadónan franses di pone bidanan na peliger. “E fransesnan por mira esaki komo héroenan den e komunidatnan na kosta di Fransia, pero ta algu horibel pa pone bida di otro marineronan na peliger”, asina e direktor general Jim Portus a bisa.
Portus a indiká ku un boto britániko a terminá ku un bentana kibrá i ku un otro a haña dañonan despues ku un kandela a originá na bordo.
Lei franses ta ordená botonan franses pa no piska ‘scallop’ durante lunanan di verano promé ku 1e di òktober, pa asina protehá e reprodukshon, segun indikashon di Parrot.
