MERKA.- Durante dje di tres edishon di ‘Latin American Music Awards’ ku lo tuma lugá dia 26 di òktober próksimo e popular kantante Pitbull lo risibí e promé ‘Dick Clark Achievement Award’ komo rekonosementu pa su trayektoria profeshonal i labor humanitario, asina e kadena di televishon Telemundo a informá.
‘Ma logra di forma parti di e mundu di espektákulo i esaki tabata mi soño for di mucha’, asina Pitbull a komentá den un komunikado di prensa. ‘Nos tur mester tin e suerte di hasi nos soñonan un realidat. Ami ta realmente bendishoná’.
E kantante ta un ehèmpel di dedikashon i entrega den e mundu di músika, kaminda aserka di su propio éksitonan a kolaborá ku artistanan manera Enrique Iglesias, Shakira, Marc Anthony, Belinda, Christina Aguilera, Chris Brown i hopi mas.
Ademas el a logra di okupá e promé lugá di popularidat ku diferente di su kansionnan.
Durante di e seremonia, Armando Christian Perez, nòmber real di Pitbull, lo hasi un presentashon bibu, den kua e lo ta kompañá pa e grupo ‘Fifth Harmony’ kaminda nan lo interpretá e kansion ‘Por Favor’.
E galardon ‘Dick Clarck Achievement Award’ a keda instalá pa rekonosé un artista latino ku a inspirá otronan ku su ehèmpel i dedikashon na músika i ku ta usa influensia di su fama pa yuda esnan den nesesidat.
‘Latin American Music Awards’ lo tuma lugá dia 26 di òktober próksimo den ‘Dobly Theatre’ na Hollywood i lo keda transmití pa e kadena Telemundo.