WILLEMSTAD.- ‘Tula the Revolt’, ‘Double Play’, ‘Bonbiní Holland’, .... kasi niun pelíkula traha na Kòrsou no falta su nòmber komo kolaboradó: Pito Polo.
Pito Polo, un ikono di mundu di pelíkula lokal. Bin sera konosí ku su mundu di pelíkula na ‘Cinema Moderna’, awe djaweps 19 aprel na Casa Moderna.
Durante ‘Cinema Moderna’ Pito Polo lo laga nos mira kon e ta transformá un potrèt, un imágen ketu pará, den un imágen ku ta move: pelíkula. Kon Pito Polo ta eksperensia e proseso artístiko aki?
Ki ta su manera di traha? Di wak pelíkula? Anto kiko ta su mes ambishonnan?
Manera semper durante ‘Cinema Moderna’ lo no tin kos di skucha so. Nos lo mira diferente ehèmpel di pelíkula ku Pito Polo stima, ku a inspir'é, ku e tabata envolví den dje.
Pito Polo ta traha komo direktor, produktor, enkargá ku iluminashon i kasi tur otro aspekto di pelíkula aki na Kòrsou. Na aña 2014 e la gana e promé premio durante ‘48 Hour Film Project Curaçao’ ku a hib'é te Hollywood.
‘Cinema Moderna’ ta un inisiativa pa laga pueblo di Kòrsou gosa di pelíkulanan lokal, di nos region òf di temanan relevante. Cinema Moderna ta hasi su esfuerso pa ta aksesibel pa tur hende. Cinema  Moderna ta tuma lugá un biaha pa luna djaweps anochi den Casa Moderna i ta grátis. Cinema Moderna ta apresiá un donashon. Cinema Moderna, na Casa Moderna, Madurostraat 60. Porta ta habri 7.30 P.M., e anochi ta kuminsá 8.00 P.M.