WILLEMSTAD.- Ayera mèrdia durante di rueda di prensa ku Minister di Enseñansa, Siensia, Kultura i Deporte, sra. Alcalá-Wallé e presentashon dje plataforma pa Karnaval a keda presentá.
Sra. Lisette Sambo-Velder, direktor di sektor di Kultura i Deporte a informá ku riba òrdu di Minister a lanta un plataforma ku ta bai salbaguardiá e kalidat di organisashon di Karnaval.
Durante dje último añanan tabatin diferente aspekto ku a haña un mihó bista riba dje i den e plataforma lo bai diskutí kon ta alsa e kalidat. E parti di globalisashon tambe ta un punto importante. Ora bo tin un bon produkto, internashonalis’é p’e krea un impakto mundial ku lo pèrkurá pa generá aktividat turístiko.
E parti edukativo tambe ta importante segun sra. Sambo, indikando ku Karnaval ta kreatividat, gruponan ta birando mas tiki, kon bo ta hasi pa promové, mester kuminsá for di chikí pa nan tambe krea un sentido di amor pa Karnaval di Kòrsou.
INTEGRANTENAN PLATAFORMA
E instansianan ku ta forma parti dje plataforma ta AGKK den persona di Henny Reinilla i Flori Tomsjansen; AMAK – Giovanni Atalita; CCGG – Benjamin Smith; CTB – Andre Rojer; Fundashon JAG – Juni i Glenda Aniceta; FKBB – Rignald Maduro i Lisette Jansen; KPC – Imro Zwerwer, Juni Sneper, Rensley Martis i Amilcar Medema.
Pa salbaguardiá kalidat mester bin kolaborashon entre e diferente partnernan pa hiba nos Karnaval na e siguiente nivel, nivel di Ekselensia.