WILLEMSTAD.- Ayera Kòrsou a konosé un kaso tristu kaminda un siklista a pèrdè su bida den tráfiko. Loke ta hasi e kaso unu mas serio ainda, ta e echo ku ta trata di un “Hit & Run”, pues e shofùr ku a dal e siklista ku outo, a bandoná e sitio i no a para i responsabilidat su mes.
Alrededor di mitar di ocho di mainta, Sentral di Polis a risibí notifikashon ku riba Schottegatweg West den yerba kantu di kaminda tin un hòmber drumí i e no tabata reakshoná.

A dirigí unidat polisial na e sitio i nan a topa ku un hòmber drumí den yerba ku sanger na su kara i no tabata duna señal bida. Tambe polis a haña un baiskel kibrá bentá den serkania di e víktima i un pia di kèts riba kaminda i tambe un pèchi ku lo ta di e siklista tambe benta den serkania. Tur kos ta mustra ku ta un vehíkulo lo a alkansá e siklista i sigui kore mirando ku tabatin markanan di brek riba kaminda.

Dòkter di polis ku a presentá na e sitio a konstatá morto di e hòmber, Maurice Orlando Pinnock, nasé na Jamaica 28 di ougùstùs 1970. Riba òrdu di fiskal di Ministerio Públiko a tuma e kurpa sin bida den beslag pa mas investigashon. Departamentu di Tráfiko ta kontinuá ku e investigashon. Esaki ta nifiká ku awor Kòrsou a konosé e di 19 morto den tráfiko pa aña 2022.

Diferente kámara

E kaso aki lo keda solushoná pronto sigur teniendo na kuenta ku diferente di e empresanan grandi riba e kaminda ei tin kámara. For di un di nan lo por saka afó ken ta esun sin kurason ku a dal un persona riba baiskel i lag’e benta manera un kiko ku ta.

Pero tambe EXTRA no por keda sin menshoná proyekto di kámara ku gobièrnu den pasado a bin kuné pero ku a wanta na algun punto.

Lei ta laga di deseá

Lamentablemente nos leinan den e kaso aki no mustra riba gravedat di e kaso.  Eksperensia den pasado a proba esaki. Ta diferente peaton i asta siklista a bira víktima di Hit & Run pero e kastigunan mara na esaki ta nada kompará ku e sufrimentu ku ta keda atras ku un pèrdida asina ki. A yega momentu pa nos parlamentu pone man na obra. Leinan antikuá mester kambia!