Ban evitá mas aksidente ku mihó komportashon den tráfiko

ORANJESTAD.-Polis di Aruba ta informá ku e Unidat Motorisá a sigui di forma aktivo ku kontrolnan den tráfiko. E tim ta skohe sitionan stratégikamente pa nan hasi kontrol den tráfiko ku e meta pa prevení aksidente, pero tambe pa hasi kontrol riba dokumentunan di vehíkulonan ku ta riba kaminda públiko. Ta chek reibeweis, seguro bálido, tambe si shofùrnan ta kore bou di influensia i naturalmente ta chek velosidat haltu tambe.

Den un anochi so e tim a repartí no ménos ku 25 but. Banda di esei asta tabatin un persekushon, ku a dura basta kòrtiku. Na un forma táktiko i profeshonalnan e polisnan a kaba e persekushon, a realisá dos detenshon i a konfiská un bròmer.

Kuerpo polisial di Aruba ta hasi un yamada na hinter komunidat indikando ku kontrolnan den tráfiko ta sigui. Tur shofùr, pèrkurá pa tur dokumentu ta na òrdu. ‘Ban evitá mas aksidente dor di komportá mihó den tráfiko, no stür bou di influensia i buska un amigu responsabel pa kore outo. Mihó yega lat ku keda sin yega nunka.