WILLEMSTAD - Ayera alrededor di 09.43’or, Sentral di Polis a risibí informashon ku un persona riba kayak a mira un kurpa sin bida pegá den e palunan di mangel na altura di e playa di piskadó na Piscadera. Mesora a dirigí un unidat di Otrobanda na e sitio.

Na su yegada el a bin topa un kurpa di un hende hòmber den awa mei mei di e palunan di mangrove. E kurpa aki ya tabata bastante di blas i por a tuma nota ku ya el a pèrdè parti di kueru.

E persona aki tabatin un karson di djins bistí i un faha pretu, miéntras e tabata lomba sunú. Polis a pidi asistensia di Warda Kosta komo ku no por a alkansá e kurpa for di tera.

Ku yudansa di personal di Wardakosta a logra saka e kurpa sin bida for di awa, di manera ku por a kuminsá ku e investigashonnan nesesario. Dòkter di polis ku a presentá na e sitio a konstatá morto.

Te na e momentunan aki, no a identifiká e kurpa aki.

Investigashon den e kaso aki ta kontinuá.