BARCELONA, AP.- Polis spañó a detektá tres trùk di hür ku e fugitivo prinsipal di e sélula ekstremista islámiko a usa. E hòmber aki a kometé dos atake mortal ku vehíkulo na Barcelona i un lokalidat turístiko serka.
E tres trùknan a wòrdu di hür ku un tarheta di krédito di Younes Abouyaaquoub, e marokano di 22 aña sospechoso di mata peatonnan na Las Ramblas Barcelona. 13 persona a muri den e atake aki i 120 a resultá heridá.
Abouyaaquoub ainda ta fugitivo i tabata opheto di un gran operashon di búskeda na nortost di Spaña.
E agente di polis, kende a pidi pa keda anónimo, a bisa ku un di e trùknan a wòrdu usá den e atake na Barcelona.
Polis ta pensa ku e sélula kier a yena e vehíkulonan ku eksplosivo pa kometé un gran atake.
Papa Fransisco a pidi final di e “violensia inhumano aki” ku a gòlpia inosentenan na Burkina Faso, Spaña i Finlandia den último dianan aki. E pontífise a pidi Dios pa “liberá mundu di e violensia inhumano aki”.
Diesocho persona a muri un siman pasá den kapital di Burkina Faso, na momentu ku ekstremistanan islámiko a mata klientenan popular di un restorant. Djabièrnè, un solisitante di asilo marokano di 18 aña a mata dos persona i heridá shete mas ku un arma blanku.
