WILLEMSTAD – Un persiguishon polisial a terminá den un aksidente na altura di santana Katóliko na Roodeweg, kaminda dado momento polis a dal den e pikòp pa pone para. Polis a logra detené un hòmber i konfiská e pikòp. Segun informashon ku EXTRA a risibí, e insidente a kuminsá despues ku e sospechoso a kaba di hòrta na e garashi di AllToCar na Veeris. E ladron lo mester a yena su pikòp ku e ekiponan hòrta inkluyendo un mashin di yena èrko i un ‘toolbox’ grandi ku diferente hèrmènt aden. Durante su intento di huida el a drenta den un kaya di tera na altura di e santana di El Seniorial tras di Sambil i einan e mashin di yena èrko lo mester a kai for di e pikòp. E persekushon a sigui te den Roodeweg ku e desenlase ya menshoná. Riba e fotonan por mira e outo di polis ku daño na su parti dilanti, miéntras ku e pikòp tambe a keda ku daño. Den e pikòp a bin topa e ‘toolbox’ grandi ku na promé instante a kere ku ta kluis di e agensia di outo pero ménos mal esei no tabata e kaso. Polis despues a bai bek den e kaya tera pa konfiská e mashin di yena èrko tambe. Finalmente polis a detené un persona i a konfiská e pikòp pa investigashon. Ainda no ta konosí si tabatin persona heridá durante e aksidente.







Laga un komentario