WILLEMSTAD – Polis di Kòrsou awe merdia a duna nòmber di persona ku a fayesé awe mainta den hospital, ku ta e ocho viktima di trafiko di e aña aki. Ta trata di hòmber shofùr Ruben G. Seibald, nasé na Kòrsou, 16 di desèmber 1961. Seibald ta un di e víktimanan ku tabata enbolbí den e aksidente fatal ku a tuma lugá riba djadumingu 13 mart 2022 riba Dominico Martina Boulevard na altura di edifisio di A.P.C.. Segun polis e ta esun ku a kousa e aksidente aki.
For di investigashon ku polis a hasi di e aksidente aki, a sali na kla for di informashon ku e kompiuter a produsí, ku e shofùr aki tabata kore 194 kilometer pa ora djis algun sekònde promé ku el a aksidentá den e otro outo ku tambe tabata kore riba e kaminda aki den e mesun direkshon. Debí na e velosidat asina haltu, e shofùr a pèrde kontrol riba su vehíkulo ku e konsekuensia ku el a dal kontra di e otro outo, poniendo ku e último aki a bai bòltu algun meter for di kaminda.
Den e outo di bòltu tabatin kuater (4) persona inkluyendo dos turista. Mirando e situashon, a pidi presensia di e ekipo di reskate di brantwer na e sitio pa asina por a yuda kòrta e vehíkulo, ku tabata di bòltu. A saka 1 persona ku a keda pega den e vehíkulo i ku no tabata e víktima, un hende muhé a sufri múltiple leshon dor di e impakto i a fayesé na e sitio mes. Dòkter di polis ku tabata presente a konstatá morto di e dama víktima.
Un investigashon penal a kuminsá kontra di e sospechoso aki, pero esaki a keda kanselá, despues ku awe mardugá a drenta e notisia ku el a bin fayesé, tresiendo e kantidat di mortonan den e aksidente aki na dos (2).