WILLEMSTAD.- Wikènt último (djasabra 10 i djadumingu 11 di novèmber)a tuma lugá e aktividat di pre-selekshon pa Tumba Hubenil 2019.
Un total di 20 mucha/hóben a presentá un tumba di añanan '70 pa un hurado skohe un kantidat di 15 ku lo partisipá na e festival mes dia 19 di yanüari próksimo. Tabata un wikènt kargá ku talento i momentunan di emoshon i dibertishon pa tur ku a akudí.
Esaki ta e mucha-/hóbennan ku a klasifiká: 1. Darlisha Valks; 2. Charlson Mercelina; 3. Quegenah Dorand; 4. Shentily Zimmerman; 5. Aalijah Heyliger; 6. Genesis Martina; 7. Chrisandher Leonora; 8. Lisanne Thomasia; 9. Quincy Gregorius; 10. Cynarah Hart; 11. Zouk’aino Jacobs; 12. Errol Cordero Reyes; 13. Xiandrah Statia; 14. Brithney Augusta i 15. Naemy Kirindongo.
E kompetensia tabata hopi fuerte, komo ku tur partisipante tabatin e mesun nivel, despues ku Fundashon Alélimo a pèrkurá pa nan tin e base fundamental pa kanto i presentashon.
Awor kos ta bai sigui. Preparashonnan lo sigui ku un tumba skirbí i areglá netamente pa kada un, ku mes òf mas atenshon ku e pre-selekshon.
Fundashon JAG i Fundashon Alélimo ta gradisí pueblo di Kòrsou pa akseptashon di e aktividat. Tambe nos ta partisipá ku karchinan pa Tumba Hubenil 2019 ya ta na benta.
Mucha (bou di 12 aña) 10 florin i hende grandi 15 florin. Karchinan ta optenibel serka tur partisipante. Por reservá tambe na 540-0826 òf via e-mail na tumbahubenil2019@gmail.com.