WILLEMSTAD.- Minister Zita Jesus-Leito, Servisio pa Planifikashon Urbano (ROP) huntu ku tim di Prekario, ta anunsiá ku ofisina pa atendé ku tur kliente pa tuma pèrmit di prekario pa stènt òf stellage pa temporada di Karnaval ta kuminsá riba 3 di yanüari.
Registrashon i pago di stènt òf stellage ta repartí segun kada sekshon. Tin 4 sekshon dividí na lèternan A, B, C i D i por pasa tuma pèrmit na ROP, Plasa Horacio Hoyer 19.
Registrashon i pago pa Stellage: Sekshon A: 3,4,5 i 7 yanüari 2019; Sekshon B: 8,9,10 i 12 yanüari 2019; Sekshon C:14 t/k 16 yanüari 2019 i Sekshon D: 17 t/k 19 yanüari 2019.
Registrashon i pago pa Stènt: Sekshon A, B, C i D: 3 yanüari te ku 16 yanüari 2019
Orario di ofisina pa Prekario Karnaval: Djaluna pa djaweps: 08:00am pa 12:00pm i  01:00pm pa 05:00pm. Djabièrnè: 08:00am pa 04:30pm i Djasabra: 5, 12 i 19 di yanüari 2019 di 09:00am pa 02:00pm.
Lista di espera ‘Wachtlijst’ ku ta nifiká inskripshon nobo por tuma lugá UNIKAMENTE online riba www.prekariocuracao.com Fecha pa inskribí riba lista di espera: 3 yanüari t/k 11 yanüari 2019. Inskripshon nobo pafó di e periodo ariba menshoná NO ta válido. Inskripshon di e aña nan anterior NO ta válido pa aña 2019.
Ta importante pa trese e siguiente dokumento nan ora bin registrá i hasi pago: Sédula (ID) válido, karta di apoderashon pa aña 2019 huntu ku sédula di e persona ku tin e prekario riba su nòmber. E karta di apoderashon ariba menshoná bo ta hañ’é riba wèpsait di prekario www.prekariocuracao.com

Personanan ku a pèrdè derechi di prekario: Tur persona mester kumpli ku reglanan stipulá den e pèrmit di prekario na momento di kita stellage, pa Karnaval 2018 esaki tabata riba 18 di febrüari 2018 promé ku 3or di atardi. Si esaki NO a tuma lugá, e persona lo risibí un karta pa informá ku esaki a pèrdè su derechi di prekario.
Henter e tim di prekario a traha inkansablemente pa ordená i manehá e parti aki di prekario karnaval. Di e forma aki, nos komunidat por disfrutá di Karnaval na un manera bon strukturá. ROP ke gradesí un i tur pa e kooperashon durante e dianan di entrega di pèrmit.
Ofisina di Tim Prekario Karnaval 2019 ta alkansabel via e number nan 462-2014, 462-4015 i tambe 433-3261. Por manda e-mail na info@prekariocuracao.com, tambe por bishita e página di facebook Prekario Kòrsou.