WILLEMSTAD.- Ayera nochi den kurá di Museo di Kòrsou a tuma lugá e di 51 entrega di Premio Cola Debrot. E aña aki e honor pa risibí e premio a toka Randal Corsen, konosido músiko lokal ku un trayektoria musikal impreshonante.
Randal a risibí for di man di promé minister, Sr. Eugene Rhuggenaath e ‘Boton Cola Debrot’ i tambe el a risibí e sertifikado di Gobièrnu di Kòrsou pa su prestashon eksepshonal riba tereno di Músika.
Su dedikashon, amor i pashon ferviente pa arte musikal. Su afan pa promové tantu músika krioyo, komo jazz i músika klásiko. Su empeño pa pone músika di Kòrsou riba un pedestal internashonal. Su partisipashon den farándula lokal, ku konsiertonan di fin di aña i partisipashon na Festival di Tumba di Kòrsou.
E estímulo pa hóbennan dediká nan mes na arte musikal. Su influensia komo dosente di músika i empeño pa instituí un estudio di músika na University of Curaçao, Dr. Moises da Costa Gomez ta argumentonan riba kua a basa e desishon pa otorgá Premio Cola Debrot 2018 na Randal Corsen.

Kuríkulo
Randal Corsen a nase na Kòrsou dia 13 di ougùstùs 1972. Na 1990 el a bai Hulanda, kaminda el a studia muzik na e konservatorio di Tilburg, Durante e 23 añanan ku el a biba na Hulanda, el a duna lès na e konservatorionan di Utrecht, Tilburg i Amsterdam. Tambe el a duna ‘master class’ i tayer na vários otro instituto di muzik na Hulanda i Europa.
Ku su mes proyektonan el a presentá regularmente riba esenarionan prestigioso na Hulanda, manera Concertgebouw Amsterdam, Bimhuis i North Sea Jazz Festival, i na otro pais manera Colombia, Cuba, Italia, Litouwen, Bèlgika, Meksiko, Guatemala, Nicaragua, Polonia, Aruba i Boneiru.
Riba su propio produkshonnan di disko kompakto el a kolaborá ku vários músiko di jazz famoso, manera e saksofonista Cubano Paquito d’Rivera, e trompetista Merikano Roy Hargrove, e baterista Meksikano Antonio Sanchez, e saksofonista Portorikeño David Sanchez i e perkushonista Kurasoleño David Sanchez.
Na 2004 e tabata e promé músiko Antiano ku a risibí e prestigioso premio Edison Jazz Award. El a haña esaki pa su promé disko kompakto bou di su mes nòmber titulá ‘Evolushon’. Pa e motibu aki AMAK a otorgá Randal e pen di mérito Edgar Supriano e mesun aña. Na 2013 el a bolbe haña un nominashon pa e premio Edison pa su di 5 produkshon titulá ‘Symbiosis’.
Pa vários aña Randal a traha ku e kantante famoso, Yu di Kòrsou, Izaline Calister, komo ko-produktor, kompositor, areglista i direktor musikal. Su komposishon ‘Wow’i Kariño’ ku letra di Izaline a bira un hit grandi na Kòrsou, Aruba i Boneiru.
Tambe el a kolaborá na vários okashon ku e mezzo soprano, Yu di Kòrsou, Tania Kross, ku a aserka Randal pa komponé e obra ‘Katibu di Shon’, basá riba e novela kòrtiku di eskritor i libretista, Carel de Haseth. Ku esaki Randal a bira e promé kompositor di un ópera na Papiamentu.
Pa e obra aki tantu Randal komo Tania Kross i Carel de Haseth a risibí e prestigioso premio Boeli van Leeuwen na 2013.
Un otro kolaborashon remarkabel ta esun ku e famoso Metropole Orkest, kaminda Randal tabata direktor musikal i areglista di e proyekto ‘Tribute to Doble R’ i tantu solista komo direktor musikal i areglista di e proyekto Palm/Plaate.
Banda di esaki Randal a komponé e ‘filmscore’ original pa e dokumentalnan di e direktor di sine Sherman de Jesus titulá ‘A Shetl in the Caribbean’ i ‘De Zero Revolutie’.
For di dia el a bin establesé na Kòrsou, Randal a traha riba vários proyekto musikal eksitoso, manera ‘Felis Enkuentro di Randal Corsen & Friends ku Grupo Serenada’, su konsiertonan di fin di aña titulá ‘Paranda di Fin di Aña’, presentashon durante di ‘Remembrance Concert’ i ‘Thnxgiving Concert’ pa El Tributo.
Na 2016 Randal a forma un Big Band pa un presentashon riba Brionplein durante selebrashon di ‘100 aña MCB’. E siguiente aña a publiká e grabashon i filmashon di e konsierto históriko aki riba YouTube i Skempi.com
Despues di esaki Randal a forma ‘Randal Corsen Orquestra’ ku kua e ta trese piesanan folklor i popular den un bachi nobo.