WILLEMSTAD.- E promé premio di 1 mion florin di nos loteria nashonal, Landsloterij, a kai aki na Kòrsou mes. E di dos premio a kai na Aruba, miéntras ku e di tres tambe a keda Kòrsou. Esei EXTRA por a komprondé for di un kombersashon ku e direktor interino di Landsloterij, sra. Jacqueline Drenthe-Marten. Esei ta nifiká ku e premio prinsipal di 1 mion florin ta ser kobrá na Kòrsou, e di dos premio ku ta di 200 mil florin ta ser pagá na Aruba, i e di tres premio di 100 mil florin ta keda na Kòrsou.

Komo insentivo pa e loteria a saka 12 premio èkstra, di kual dos di 10.000 florin, dos di 7.500 florin, kuater di 5.000 florin i kuater di 2.500 florin.

Segun sra. Drenthe, pa loke ta e benta dje loteria en general, e por bisa ku esaki a bai di tal forma ku Landsloterij por kubri e gastunan envolví. Naturalmente tabata deseabel pa e benta ta shen porshento, pero esei no tabata e kaso. Pero e siman aki gerensia di e loteria lo hiba kombersashon ku e personal i tambe tur otro aktor pa sa kon a bai e benta den aña 2016 i kiko t’e sugerensianan pa mehorá esaki den 2017.