WILLEMSTAD.- Na Merka e ta eksistí añanan largu kaba, pero na Ulanda ayera anochi tabatin pa e promé bia: un premio spesial pa aktor koló skur. E premio ‘DBUFF Otto Sterman Oevre Award’ ta un inisiativa di e aktor i direktor nasé na Kòrsou Raymi Sambo (46) i e organisashon di Da Bounce Urban Film Festival. Asina Ret Karibense ta skibi. “Un premio ku a originá for di nesesidat”, asina Sambo ta yama e kondekorashon pa artista ulandes koló skur. Den su mes ambiente Sambo a haña hopi reakshon positivo, pero riba media sosial e reakshonnan tabata ménos positivo. ‘Ko‘i hari’ Sambo ta haña. “Un hende a skibi: kòrda ku si a duna e premio aki solamente na aktor blanku, Ulanda lo a bira loko.” Sambo: “Mi ta haña dibertido pasobra loke ta pasando aktualmente ta netamente rasismo, ku aktor koló skur na Ulanda apénas ta haña papel prinsipal i kasi nunka no ta den spòtlait.” Sambo mes tin un kantidat di eksperensia rasista di den e mundu di sine i teatro ulandes. “Nan no ker a laga mi bini oudishon pa e sine ulandes Monte Carlo, pasobra mi no tabata basta skur. E uso di stéreo tipo tabata un shòk.” No opstante e pasado negativo kontra kua e ‘DBUFF Otto Sterman Oeuvre Award’ a originá, Sambo ta mira futuro positivo. “Mi ta mira ku e generashon nobo di aktor koló skur ta mihó pará kaba ku mi generashon i e generashon promé ku mi”, Sambo ta splika. “Mi ta boga pa mas papel prinsipal. Asina den e serie ‘Meisjes van Plezier’ (Mucha muhé di plaser) mi no a mira niun aktris pretu komo protagonista”, segun Sambo. “Den un kapítulo nos tin un dama koló skur, e ofisina di ‘casting’ a kontestá. Pero e ora ei ami ta bisa ‘ta kiko ta un’. Unu so no ta basta.”