WILLEMSTAD – Prensa di Costa Rica tabatin bon palabra pa e aktuashon di nos selekshon nashonal di futbòl i na mes momentu a señalá si no tabata Keylor Navas, e ekipo lo a laga nan pais pasa bèrgwensa. Ronald Gonzalez, tékniko di e selekshon di Costa Rica tabata desapuntá den su ekipo miéntras ku Direktor Tékniko di Kòrsou, Remko Bicentini tabata kontentu ku e resultado final. E ta kere ku Kòrsou mester a gana e wega i a kai kòrtiku ku esaki.

Ku e empate aki, Kòrsou ta keda komo lider di Grupo D den e fase di grupo ku 5 punto i awor tin su destino den su propio man. Ku un viktoria kontra Costa Rica dia 14 di novèmber aki den Stadion Ergilio Hato kontra Costa Rica, Kòrsou ta sali na promé lugá den e grupo i ta pasa p e fase final di Nations League na yüni di 2020. Si Kòrsou keda empatá ku Costa Rica aki na kas, ta sigurá di un segundo puesto i ta evitá degradashon pa Liga B di Nations League. Ku un derota kos ta kompliká i mester sinta wak kiko e resultado ta bira e ora ei di e wega entre Haiti i Costa Rica dia 17 di novèmber. Importante ta ku awor aki Kòrsou tin su propio destino den su man.

Importante tambe ta ku e resultado di ayera sin duda lo bai yuda e klasifikashon di Kòrsou riba e tabla di posishon di Fifa ku ta di sumo importansia pa klasifikashon pa Mundial di Qatar na 2022.

Bicentini a bisa durante di e konferensia di prensa na Costa Rica ayera anochi ku nan no tabata sa ku kua estilo di wega Costa Rica lo a bin kuné pa e wega aki. El a indiká ku e parti fuerte di Kòrsou ta ku pa último añanan a bin ta hunga e mesun sistema di wega i esei ta e parti fuerte di e selekshon. “Via e sistema di bon kombinashon, Kòrsou tabatin 5 oportunidat kla di gol. Pa e próksimo wega nos lo tin ku hasi esaki mihó.”  A spera ku Costa Rica lo ta un ekipo hopi ofensivo i ku nan lo a bin pa gana e wega aki komokiera ku a empatá ku Haiti na 1-1. “Den promé mitar di wega nos a hunga masha bon mes.” Riba e pregunta kua ekipo na su pareser tabata mas fuerte, Haiti of Costa Rica, Bicentini a kontesta Costa Rica. Mesora a señalá si ku ámbos wega tabata duru. Finalmente Bicentini a bisa pa gana e grupo aki lo nifiká masha hopi mes pa Kòrsou i su persona. “Tur kos ta den nos mes man awor, na kas nos tin nos públiko nos tras ku lo ta e di 12 hungadó den tereno di wega. Sabiendo esaki, nos mester finalisá komo number 1 i esei lo ta meta di Kòrsou.”

Kapitan di nos selekshon, Leandro Bacuna despues di wega den su entrevista a bisa den promé mitar di wega Kòrsou tabata bon ku algun oportunidat. Navas ta simplemente un kiper fabuloso, un di e mihónan di mundu i tabatin algun salbashon masha bon mes. “Nos ta kontentu ku por sali Costa Rica ku 1 punto i mantené nos mes komo lider di e grupo.” Bacuna tambe ta kere ku e wega aki an Kòrsou lo ta totalmente diferente i ku fanátikonan nan tras. “Lo ta un wega duru sigur.”

Prensa di Costa Rica a bisa ku ora e gruponan a sali i a bira konosí ku nan lo topa Haiti i Kòrsou, ku esaki lo ta fásil pa nan. Todo lo kontrali, despues di 2 wega nan tin apénas 2 punto. Liña kora ta ku prensa di e pais ta mustra riba e problemanan ku ekipo nashonal ta konfrontá. Un ekipo ku tabata den Mundial na Brazil i tambe aña pasa. Finalmente e tékniko di Costa Rica, Ronald Gonzalez a bisa ku e resultado di ayera tabata malu. E ta señalá ku e ekipo aki solamente por a train 3 biaha huntu i ya e tin un idea kiko e próksimo paso lo bira. E no ta bai akseptá hungadónan ku no ta duna lo máksimo. “Ayera nos a falta mobilidat. Nos a hasi vários eror pero ta konsiente di nan. Den futuro nos lo bai tin mas opshon. E ekipo aki lo sigui krese. Solamente mi falta un poko mas tempu ku e hungadónan.”