WILLEMSTAD.- Ya ta kuestion di algun dia pa Jazz Meets Cultures, un evento úniko kaminda ku e músika Jazz ta topa kultura, mihó bisá nos géneronan lokal manera Tumba, Seú, Simadan, Tambú, Kizomba, Reggae, Ritmo Kombiná, Zouk i Son Montuno, ku e meta pa rekoudá fondo pa yuda nos hóbennan ku nan desaroyo artístiko.
T’asina ku ya e músikonan tin algun siman preparando pa e gran dia aki pa laga komunidat eksperensiá un evento di kalidat haltu, unda ku lo tin fushon di jazz i diferente género di músika. Manera ya anunsiá, JMC ta konta ku únikamente nos músikonan lokal.
Dado kaso ku bo no tin karchi ainda, por akudí na un di e puntonan di benta. Karchi general ta optenibel na 24 Uur uit de muur, Beep Beep, Mensing’s Caminada, Fusions, Gosie Grill, 4th of July Snack, Van den Tweel Zeelandia i Janthiel òf tambe online na www.ticketscaribbean.com. Karchi VIP ta optenibel na 685-0650.
Pa mas informashon, por bishitá Jazz Meets Cultures riba retnan sosial, yama 540-0111 òf e-mail info@jazzmeetscultures.com.
E kombinashon di potrèt ta duna un bista di ensayo di Grupo Trinchera, Grupo Kompèr i Ivan Belfor. Nos ta topa djasabra awor 23 di yüni na Landhuis Brievengat.