WILLEMSTAD.- Ayera tardi e organisashon Sterck Events a tene un rueda di prensa pa dje forma ei duna detayenan relashoná ku e tremendo konsierto di EDM (Electronic Dance Music) ‘The Flying Dutch Curaçao’ ku ta bai tuma lugá dia 25 di òktober próksimo.
Durante dje rueda di prensa a mustra kon henter e area ta bai keda kambia i bira un e sitio di konsierto kaminda lo por akapará mas o ménos 6 mil hende. Un lugá di parker grandi lo bai keda drecha i e públiko lo tin chèns pa pasa via di Koral Specht i yega e sitio di parker kaminda lo tin bus ku lo sòru pa e transporte pa yega e entrada dje sitio di konsierto.

5 DIA
Sinku dia di aktividat ta loke ku lo tin. E organisashon huntu ku partnernan a hinka un kalendario di aktividat den otro kaminda lo ofresé no solamente e bishitante di eksterior pero tambe esun lokal aktividatnan musikal kaminda e públiko por asistí grátis.
Promoshon pa e evento a keda hasi internashonalmente den kolaborashon ku Ofisina di Turismo i e reakshon ta realmente impreshonante segun informashon ku Herman ‘Manchi’ Harms a kompartí. Na Ulanda tin paketenan di kompanianan di biahe pa esnan interesá i mester bisa ku e fanátikonan di Armin van Buuren, 5 biaha mihó dj di mundu, ta entusiasmá pa bishita e promé edishon di ‘The Flying Dutch Curaçao’.
‘Sterck Events’ ta trahando riba tur detaye dje konsierto i a indiká ku nan a hasi tur petishon pa pèrmitnan nesesario i ta trahando huntu ku instansianan gubernamental pa kumpli ku tur rekisito pa e evento por bira un eksitoso.
Manchi Harms a indiká pa keda pendiente pa segun dianan ta aserkando ku e organisadónan lo sigui duna mas detaye dje evento.
Karchinan pa e evento ya ta optenibel na puntonan di benta konosí i apart di sekshon general, tin un sekshon VIP i tambe un sekshon ‘Super Fan’ kaminda lo bo ta para dilanti di stage ku tur e fasilidatnan ku bo mester pa disfrutá dje evento.