WILLEMSTAD.- Djadumingu otro siman, 5 di mei 2019 e organisashon ‘Wintertuin Curaçao’ lo presentá e di tres buki di Kurá di Kuenta, un proyekto pa dokumentá kuenta di nos grandinan.
E evento ta tuma lugá den Hòfi Wayaka na Habaai i entrada lo ta grátis.
Dies abitante i kliente di Fundashon Birgen di Rosario lo subi riba tarima i konta kuenta tokante amigu, entiero, tambú, wega di plaka, misterio, yama danki i hopi tema mas.
Sinku luna largu e klientenan a konta, skirbi i redigí nan tekstonan bou di guia di eskritor Calviany Eleonora. E mihó tekstonan a keda kompilá den e buki.
Kurá di Kuenta ta un proyekto di Wintertuin Curaçao, Fundashon Birgen di Rosario, NAAM i University of Curaçao.