WILLEMSTAD.- Awe djasabra 10 di febrüari, lo tin otro presentashon di e Quinteto di Metal ( brass) den Foodcourt na Sambil. Dos siman pasá, bou di direkshon di maestro Albany Castro,  vários di e músikonan ku a bini pa toka pa Festival di Tumba, a duna un  tremendo konsierto ku a keda duná na Sambil.
Vários tabata e personanan ku a haña kaminda pa Sambil, kaminda nan a disfrutá di un  variedat enorme di género musikal ku e grupo aki a presentá. Mirando ku e presentashon di biaha pasá tabata un éksito, Sambil ta bolbe organisá un presentashon di e músikonan di Venezuela ku ta aki.

Músikonan ku lo presentá
E músikonan ku lo bai forma parti di e ensamble di Brass aki lo ta Franklin Rodriguez i Hector Velazquez riba trombon,  Rafael Rey i Joel Patiño riba trompèt, Hugo Olivero riba Alto Sax i  Darwin Manzi lo toka tuba riba keys. Marlon “Lonte” Conradus lo ta riba drùms. Biaha pasá tabata Pepito Reyes ku a toka. E biaha aki tambe lo tin un variashon di músika ku lo keda toká.

Músikonan lokal ta invitá
Un invitashon ta bai na músikonan lokal, pero mas ku tur supladónan di brass, tantu saxofon, tròmpèt i trombon, pa nan presensia e ensamble aki i eventual despues di e presentashon papia ku e músikonan aki ku ta mas ku disponibel pa kombersá ku músikonan lokal i duna nan teps.
E presentashon di e ensable aki lo ta pa 5’or di atardi. Pues un invitashon ta bai na tur hende pa nan bin presensiá e presentashon aki. Un boka bisa otro.