WILLEMSTAD.- Ayera tardi e organisashon ‘Miss Curaçao Beauty Pageant Committee’ a presentá ofisialmente e kandidatanan pa e sertámen di ‘Miss Curaçao Beauty Pageant 2018’.
E sertámen aki lo sirbi pa eligí Kòrsou su representantenan pa diferente sertámen di beyesa internashonal manera entre otro: ‘Miss Universe’, ‘Miss World’ i ‘Miss International’.
Un total di 6 kandidata ta partisipá na e sertámen. Despues di nan promé presentashon nan a skohe nan órden di partisipashon ku ta lo siguiente: 1. Akisha Albert, 23 aña; 2. Diona Angela, 21 aña; 3. Tiffany de Freitas Bras, 19 aña; Dailin Viera, 19 aña; Nkira Chippendale, 23 aña i Nazira Colastica, 18 aña.
Sertámen di beyesa mayoria biaha ta wòrdu impliká ku ta únikamente e parti físiko di e partisipantenan ta konta pa e por keda eligí komo un embahadora.
Sertámen di beyesa internashonal kada aña di nobo ta pone mas énfasis riba e personalidat di e kandidata partisipante.
E konsepto internashonal di beyesa ta enserá ku un dama bunita mester por komuniká bon ku otronan, kombersando riba tópikonan di interes general.
Komo ku sertámen ‘Miss Curaçao Beauty Pageant’ no ta otro ku un preámbulo pa diferente sertámen internashonal, ta nesesario pa nos kandidatanan ta bon prepará pa tur aspekto enserá den partisipashon na un sertámen internashonal.

SERTAMEN
Pa loke ta trata e sertámennan preliminar, djasabra 25 di ougùstùs lo tuma lugá e sertámen di ‘Miss Elegansia’ na Renaissance Curaçao Resort & Casino. Dia 2 di sèptèmber lo tin e sertámen di ‘Miss Playa’ i e sertámen final di ‘Miss Curaçao Beauty Pageant 2018’ lo tuma lugá dia 8 di sèptèmber 2018 na W.T.C.